Avokadó – Ofurnærandi ávöxturinn

Þessi dökkgræni kremkenndi ávöxtur færir okkur mikla hollustu hvort heldur sem fæða eða næring útvortis fyrir húðina. Avokadó inniheldur m.a. B- og E-vítamín, betakaroteníð, trefjar, andoxunarefni, fólínsýru, jurtanæringarefni og hollar einómettaðar fitusýrur. Þrátt fyrir að vera fituríkur ávöxtur þá er fitan í avokadó heilsusamleg fyrir okkur og getur hugsanlega hjálpað okkur við að veita okkur seddutilfinningu fyrr þar sem hún hefur áhrif á boðefni í heila sem segir til um að hvenær við erum orðin södd. Avokadó olían fæst líka kaldpressuð á flöskum í heilsuverslunum en hún er gjarnan notuð  útvortis á þurrk í húð, exem og til sem alhliða uppbyggjandi næring fyrir húðina. Ef þið hafið ekki prófað avokadó þá skora ég á ykkur að prófa og gera þennan ofurholla ávöxt hluta af mataræði ykkar en það eru margar leiðir til að nota avokadó eins og út á salat, í boost sem fylling, í eftirrétti, sem álegg ofan á brauð og líka gott eitt og sér með smá salti og pipar. Ég stappaði oft banana og avokadó ofan í börnin mín þegar þau voru yngri sem þeim þótti afar gott og saðsamt. Mig langar að deila með ykkur uppskrift að snöggum avokadó súkkulaðibúðing sem er gott að  græja á augabragði þegar manni langar í eitthvað smá sætt.

Avokadó
súkkulaðibúðingur

1 avokadó
½ banani eða mangó
1 tsk kókosolía
1-2 msk hreint kakóduft
Nokkrir dropar vanillustevia
Pínu vatn eða rísmjólk til að þynna ef þörf
Smá sjávarsalt
-Öllu skellt í töfrasprota eða blandara og tilbúið!

Heilsukveðja, Ásdís grasalæknir.
www.facebook.com/grasalaeknir.is
www.pinterest.com/grasalaeknir