Kókosbolluþrýstingur!

Ég er ótrúlega auðtrúa sem hefur sína kosti og galla. Kostirnir eru að ég er til í að prófa ýmislegt og er jákvæð fyrir nýjungum en gallinn er sá að ég hef gert ótrúlega heimskulega hluti þegar ég hef hlustað á ráðleggingar annarra. Fjölskyldan hefur ekki farið varhluta af þessu og stundum dáist ég að langlundargeði þeirra í minn garð. Það gætu t.d. einhverjir sett spurningarmerki við það, að ég límdi niður annað eyrað á syni mínum þegar hann var nokkra vikna. Þetta gerði ég til að færa eyrað aðeins nær höfðinu en ,,það var sagt mér“ að þegar börnin væru svona ung væri eyrað svo mjúkt og því væri best að gera þetta sem fyrst. Það var erfitt að útskýra stóra heftiplásturinn sem huldi hálft höfuð sonarins fyrir föður hans þegar hann kom heim og enn erfiðara að þurfa að raka hárið af honum í kjölfarið þar sem límið festist að sjálfsögðu í því litla hári sem prýddi kollinn hans. Ég er enn að reyna að útskýra fyrir syni mínum af hverju ég taldi þetta góða hugmynd - hluti af fyrirgefningu hans er að leyfa mér að birta þetta hér!!

Þegar ég las að konur sem væru farnar að lengja eftir  fæðingu ættu að borða kókosbollu og drekka kók til að mynda þrýsting í kviðarholinu og með því mundi barnið ,,spýtast“ út,  fannst mér eðlilegasti hlutur í heimi að gera þessa tilraun á systur minni sem var komin nokkra daga framyfir. Við úðuðum þessu í okkur (ég til stuðnings) en hún átti ekki son sinn fyrr en 10 dögum síðar. Móðir okkar var ekki ánægð með mig og heyri ég enn í henni þar sem hún segir  ,,Anna Lóa, ég átti nú ekki von á þessari vitleysu frá þér“.  Systir mín man sem betur fer lítið eftir þessu, hefur reyndar ekki getað sett kókosbollur inn fyrir varirnar í 23 ár en sonur hennar er alheilbrigður og yndislegur.

En stundum er það bara þannig að við gerum eitthvað af því að við höfum lært það af einhverjum öðrum og erum þá ekki að spyrja hvort þetta sé rétt eða virki, við framkvæmum bara. Ég er ekkert viss um að maður bæti minnið með því að drekka kartöfluvatn en amma mín gerði það og þá gerir maður það bara. Hvort hárið vaxið hraðar og verði þykkara þegar maður er búin að nudda hársvörðinn upp úr Nivea-kremi kem ég aldrei til með að vita 100% en kannski allt í lagi að segja frá því hér að hárið á mér er ekki svona feitt, meðferðin sjáið þið til. Svo kemur nú reyndar fyrir að ég játa að ég þurfi kannski að endurskoða aðferðir mínar og einstaka sinnum geri ég það.

Þannig var það t.d. á dögunum þegar ég keypti mér grænan undradrykk úr heilsuhillunni en fyrir utan að vera allra meina bót þá átti myntu-innihaldið að gera það að verkum að andardrátturinn minnti á ferskan andblæ af nýsprottinni myntujurt. Ég tók inn ráðlagðan dagskammt en eitthvað lét ferski andardrátturinn á sér standa svo ég tvöfaldaði skammtinn. Á stuttum tíma fann ég hvernig ferski andblærinn minnti frekar á eitthvað sem við urðum vitni að hjá Hallgrími matsveini í Heilsubælinu - og ég sannfærð um að nú væru tennurnar ónýtar og ég skyldi sætta mig við að fara að velja mér stell. Með kvíðahnút í maganum pantaði ég neyðartíma hjá tannlækni sem skynjaði neyðina berum augum þegar ég mætti niðurbrotin á stofuna. Ég sagði honum eins og var að það væri greinilega eitthvað mikið að gerast í munninum á mér og bað hann að færa mér fréttirnar varlega. Hann leit upp í mig og segir svo ,,hvað hefur þú verið að drekka Anna Lóa mín, þú ert með extra mikið af fagurgrænum tannsteini sem gæti verið sökudólgurinn. Held að munnurinn á þér sé bara fullur af úldnu grasi“. Tannsi hreinsaði tennurnar og ég labbaði út með nýja tannkremstúpu og nýtt og ferskt myntubragð í munni.

Nú að lokum, ef einhverjir eru að spá í af hverju ég labba svona einkennilega þegar ég tek heilsugönguna mína hér um bæinn þá skuluð þið bara prófa að setja baun á milli rasskinnanna og ganga 6 kílómetra. Allir sem á annað borð hafa einhvern áhuga á líkamanum vita að þetta er besta leiðin til að fá stinna rassvöðva!

Þangað til næst - gangi þér vel!
Anna Lóa
Fylgstu með mér - http://www.facebook.com/Hamingjuhornid