Er hægt að fá einn kaffibolla!

Við ákváðum að fara í bíltúr í páskafríinu. Keyrðum austur fyrir fjall og þegar við erum á leið niður Kambana fann ég kaffiþorstann hellast yfir mig. Sá fyrir mér að við gætum sest niður og fengið okkur kaffi og eitthvað gott með því. Ég ákvað því að stinga upp á að setjast einhvers staðar inn og fá sér kaffisopa - já eða svona óbeint.

Segi því: veistu, er eitthvað kaffihús í Hveragerði núna eftir að Eden hætti? Agalega leiðinlegt að geta ekki stoppað í gamla góða Eden. Það var alltaf svo huggulegt hérna í gamla daga. Heldurðu að það sé einhver spennandi staður hérna núna, ha??

Hann: hum, ég bara veit það ekki satt best að segja.

Keyrðum áfram og hann var ekkert á því að athuga með hvort það væri eitthvað kaffihús í Hveragerði. Hann hægði ekki einu sinni á sér og ég fann hvernig kaffiþorstinn ágerðist. Vorum komin á Selfoss þegar ég ákvað að gera aðra tilraun.

Segi því:  ég hef heyrt að það sé svo agalega huggulegt að fá sér kaffi hér á Selfossi. Selfyssingar eru svo sniðugir eitthvað þegar kemur að svona hlutum. Hefur þú heyrt um krúttlega kaffihúsið hérna - gamaldags og svona í okkar anda? Held það heiti meira að segja Kaffi Krús - krúttlegt ha!!

Hann: já ok, ekkert heyrt um það. Kaffi Krús, sniðugt nafn.

Við keyrum niður aðalgötuna og ég sé glitta í kaffihúsið og hrópa: þarna er það - sjáðu. Hann hægir á sér, horfir út um gluggann og segir: já einmitt - hum, Kaffi Krús!!  Svo mumlaði hann bara áfram: Kaffi Krús, Kaffi Krús! En ekki stoppaði hann, nei nei.

Við ókum áfram sem leið lá út úr bænum og ég hugsaði: hvað er að manninum, er hann ekki að ná þessu. Þegar við keyrðum yfir bæjarmörkin á Hellu sagði ég: það er víst alltaf rosa huggulegt kökuhlaðborð hérna á kaffihúsinu á staðnum sem er hérna við Rangána. Veit að Magga frænka fer oft hingað með fjölskylduna og segir að þetta sé svo fínt - útsýni yfir ána.

Hann: já ok - frábær staðsetning. Hvað er annars að frétta af Möggu?

Ekkert meira. Ekki stakt orð um að stoppa og fá sér kaffi. ,,Hvað er að frétta af Möggu“ hvað var nú það......Ég var alveg hætt að skilja þetta. Átti ekki bara að keyra með mann hálfa leið í kringum landið án þess að gefa manni vott eða þurrt. Hefði þá ekki verið bara betra að setja upp næringu í æð eða gera alla vega einhverjar ráðstafanir.

Ég gat ekki meira og hálf öskraði: hvað þarf maður að gera til að fá einn kaffibolla, ég spyr. Er ekki allt í lagi með þig, á bara að keyra með mann þar til maður er þurrausin að innan og ropar ryki!! Er til of mikils mælst að gefa manni eins og einn helv... kaffibolla.

Hann horfði á mig furðulostinn og stoppar bílinn úti í kanti. Lítur á mig og segir: bíddu, þú hefur ekkert  beðið mig um að stoppa til að fá kaffi.  Ég var einmitt að hugsa um að stinga upp á því sjálfur.

Ég: Hvað meinarðu, ég er búin að vera að gefa þetta í skyn síðan við keyrðum niður Kambana. Þú áttar þig kannski ekki á því en þetta sem stendur út úr hauskúpunni á þér heita eyru og með þeim hlustar maður.

Hann: Ég var síst að skilja þetta, þú ert bara búin að vera að spjalla þetta fram og til baka um kaffihús á leiðinni. Ég hélt kannski að þú værir að hugsa um að fara út í ,,buisniss“ og opna kaffihús hér fyrir austan eða eitthvað - ég var meira að segja farinn að velta fyrir mér nafni. Ég heyrði bara ekki eitt orð um að þig langaði í kaffi. Af hverju sagðir þú það ekki bara beint út?

Ég trúði ekki mínum eigin eyrum og sagði: heyrðu, við skulum bara sleppa þessu - ótrúlegt að þú hafir ekki náð þessu.

Þangað til næst - gangi þér vel!
Anna Lóa
Fylgstu með mér - http://www.facebook.com/Hamingjuhornid