„Nú höldum við út á lendurnar saman til sigurs“

„Með firnasterkt endurnýjað umboð held ég áfram að berjast fyrir þessu í þágu kjördæmisins alls enda höfuðmarkmiðið að ná baráttumálunum í höfn,“ sagði Vilhjálmur Árnason, í færslu á Facebook eftir prókjör Sjálfstæðisflokksins í Suðurkjördæmi.

„Bestu fréttir helgarinnar eru þær að alls greiddu 4647 atkvæði í prófkjörinu í Suðurkjördæmi. Þar fékk fólkið sjálft að velja frambjóðendur, milliliðalaust. Ég hef margsinnis heyrt aðra flokka tala af mikilli innlifun um ást sína á lýðræðinu en þegar til kastanna kemur þá er Sjálfstæðisflokkurinn eina alvöru lýðræðislega fjöldahreyfingin á Íslandi. Punktur. Niðurstaðan í prófkjöri Sjálfstæðisflokksins liggur þannig fyrir öllum ljós, verklag og allar tölur öllum aðgengilegar og hið margumrædda gagnsæi því algjört.

Stjórnmálafræðiprófessorinn, Ólafur Þ. Harðarson, segir á síðu sinni að mesta athygli sína veki „þó kjörsóknin í prófkjörinu í Suður, en hún var 64% af atkvæðafjölda flokksins í kjördæminu 2017.“ Þetta vekur líka athygli mína. Ég trúi því að þessi mikla þátttaka gefi sjálfstæðisfólki fyrirheit um góða uppskeru í haust en við þurfum auðvitað að koma henni í hús með dugnaði og samstöðu.   

Síðustu vikur höfum við frambjóðendur ferðast um allt okkar stóra kjördæmi og tekið fólk tali. Við höfum komið á sömu staði oft og fundið fyrir hjartslættinum í kjördæminu. Við vitum að það er verk að vinna og ég var glaður að finna að markmiðin sem ég setti fram um myndarlega endurreisn atvinnulífsins, fyrsta flokks heilbrigðisþjónustu fyrir alla, öflugar samgöngur og valfrelsi fjölskyldunnar eiga miklu fylgi að fagna.

Að lokum vil ég óska Guðrúnu Hafsteinsdóttur til hamingju með kjörið og þakka henni fyrir drengilega kosningabaráttu. Ég óska öðrum frambjóðendum á listanum til hamingju sömuleiðis. Nú höldum við út á lendurnar saman til sigurs.“