Yfirsýn á hamfarasvæði

Yfirsýn er heiti ljósmyndasýningar Hilmars Braga Bárðarsonar í Átthagastofu Bókasafns Reykjanesbæjar. Sýningin er opin á opnunartíma Bókasafns Reykjanesbæjar fram yfir Safnahelgi á Suðurnesjum í mars.

Á þessari sýningu sýnir Hilmar Bragi ljósmyndir frá sjónarhorni sem við eigum ekki að venjast, allar myndirnar eru teknar með dróna og flestar lóðrétt niður.
Hilmar Bragi tekur á móti gestum á sýningunni föstudaginn 21. febrúar á milli kl. 16 og18.

Ekki gat orðið af því að hann tæki á móti gestum síðasta föstudag þar sem óveðurslægð setti allt úr skorðum.

Myndin hér að ofan er einmitt tekin eftir óveðrið. Þarna má sjá Miðbryggjuna neðan við Fischers­hús í Keflavík en bryggjan, sem er aldargömul, skemmdist í veðrinu og brot úr henni er m.a. komið upp í sjóvarnagarðinn.