Vopnuð ungmenni með áfengi og landa í Vogum

Á tólfta tímanum á laugardagskvöld höfðu lögreglumenn afskipti af tveimur piltum, 16 og 17 ára, þar sem þeir voru í bifreið í Vogum. Við skoðun kom í ljós að þeir höfðu í fórum sínum loftskammbyssu og hnúajárn en varsla á þessum munum telst til brota á vopnalögum.

Einnig höfðu þeir í fórum sínum hálffulla áfengisflösku og slatta af meintum landa í brúsa. Piltarnir voru færðir á lögreglustöð þar sem þeir voru yfirheyrðir.

Að loknum yfirheyrslum var piltunum komið í hendurnar á forráðamönnum sínum. Piltarnir eru búsettir á höfuðborgarsvæðinu.