Vonast til að fleiri úr hópi eldra fólks sækja sér heilsueflingu

Umsögn öldungaráðs Reykjanesbæjar um erindi Félags eldri borgara á Suðurnesjum varðandi niðurgreiðslur á sundleikfimi var tekin fyrir á síðasta fundi velferðarráðs Reykjanesbæjar en velferðarráð óskaði eftir umsögninni á fundi sínum þann 15. febrúar síðastliðinn.

Ákveðið hefur verið að taka upp hvatagreiðslur fyrir eldra fólk frá janúar 2024. Hvatagreiðslur eru ætlaðar til lækkunar á námskeiðsgjöldum. Þá getur hver og einn valið sína heilsueflingu á eigin forsendum og fellur námskeið í sundi þar undir ásamt annarri heilsueflandi virkni. Að mati velferðarráðs er mikilvægt að það ríki jafnræði á meðal eldra fólks í Reykjanesbæ og allir geti fundið eitthvað við sitt hæfi, getu og markmið, t.d. golf, líkamsrækt, Janus heilsueflingu o.fl. Það er von ráðsins að með þessu móti muni fleiri úr hópi eldra fólks sækja sér heilsueflingu í sveitarfélaginu.

Þá kemur fram í fundargerð velferðarráðs að það tekur undir bókun sem bæjarráð lagði fram þann 23. mars sl. um hvatagreiðslur fyrir eldra fólk.