Vonast til að allir nýnemar fái inngöngu í FS

Alls sóttu 235 nýnemar um skólavist í Fjölbrautaskóla Suðurnesja. Að sögn Kristjáns Ásmundssonar er vonast til að allir nemendur fái inngöngu í skólann. „Þetta er allt spurning um ígildi sem skólinn fær greitt fyrir frá ríkinu. En skólinn er með ígildi fyrir um 810 nemendur.“

Ekki þýðir það að pláss sé fyrir 810 nemendur en ígildið er reiknað út frá heildar einingafjölda allra nemenda skólans sem er svo deilt á meðal einingafjölda nemenda. „Fjölbrautaskólinn hefur pláss fyrir þessa nemendur en með nýnemum eru þeir orðnir yfir 1000. Þetta er allt spurning um hversu marga við fáum að taka inn.“

„Það eru nýnemarnir sem ganga fyrir en þeir sem eru eldri og hafa áður sótt um skólavist en snúist hugur um að stunda nám lenda aftar í röðinni,“ sagði Kristján og bætti við að í fyrra hafi langflestir fengið inngöngu í skólann og því líklegt að sama væri upp á teningnum núna.

Í fréttum Bylgjunnar var sagt frá því að allir nýnemar myndu fá inngöngu í framhaldsskólum landsins, þó að hlutfall þeirra sem sækja um nám væri hærra en áður. Í fyrra biðu nýnemar í óvissu um skólavist langt fram á sumarið en vonast er til að sú bið styttist með tilkomu nýja innritunarkerfisins sem fjölbrautaskólar nota.