Vonandi er þetta botninn

Fjöldi fólks á atvinnuleysisskrá í Sandgerði er nú 9 manns en 5 hafa bæst við á stuttum tíma. Að sögn Sigurðar Vals Ásbjarnarsonar, bæjarstjóra hafa ekki verið svo margir á skrá í langan tíma.
Atvinnuástand hefur samt sem áður verið mjög gott að undanförnu og mikið að gerast í bæjarfélaginu. Öflug uppbygging hefur átt sér stað í skólanum og leikskólamál eru í góðum farvegi. Náttúrustofan hefur einnig haft góð áhrif á bæjarlífið. „Það er sorglegt að vita af því að kvótinn fer og við eigum enn eftir að sjá hvernig okkur reiðir af í því máli“, segir Sigurður en bætir við að margir öflugir aðilar hafa aðstöðu í Sandgerðishöfn og hafa heildartekjur því staðið í stað. Sjómannaverkfallið hafði einnig mikil áhrif en minni bátar gátu róið þó Nesfiskur og fleiri hafi þurft að stöðva vinnslu. Það var mikill missir af Miðnesi en Skinnfiskur er með rekstur í Sandgerði og einn aðili hefur verið með fólk í vinnu við flökun í flug. Sigurður vonaði að þetta væri botninn en erfitt er að segja til um hvað gerist með haustinu.