Vonandi aðeins upphafið að meiri umferð slíkra skipa til Keflavíkurhafnar

Reykjaneshöfn hefur síðastliðið ár, í samstarfi við Markaðsstofu Reykjanes og Reykjanesbæ, unnið að komu smærri skemmtiferðaskipa til Suðurnesja og lagt þar áherslu á að Keflavíkurhöfn hentaði vel til móttöku slíkra skipa.

„Stjórn Reykjaneshafnar fagnar því að það starf sem hófst á árinu 2019 við markaðssetningu m.a. á Keflavíkurhöfn sem viðkomustað smærri skemmtiferðaskipa virðist vera að skila sér. Í ár hafa fjögur skemmtiferðaskip komið á ytri höfnina og nýtt sér þá aðstöðu í Keflavíkurhöfn sem þjónustar léttabáta varðandi losun og lestun farþega eða vöru.

Eitt skemmtiferðaskip lagðist að hafnarkanti í Keflavíkurhöfn þar sem farþegar voru sóttir af ferðaþjónustuaðilum til skoðunarferðar á Suðurnesjum. Er það von stjórnar Reykjaneshafnar að þetta sé aðeins upphafið að meiri umferð slíkra skipa til Keflavíkurhafnar á komandi árum,“ segir í afgreiðslu stjórnar hafnarinnar sem samþykkt var samhljóða á fundi þann 26. ágúst síðastliðinn.