Vogar: Alvarleg slagsíða komin á fjárhag sveitarfélagsins
Rekstrarafkoma sveitarfélagsins Voga er verulega lakari en fjárhagsáætlanir gerðu ráð fyrir og stendur núverandi meirihluti frammi fyrir alvarlegum fjárhagsvanda. Reksturinn hefur skilað litlu sem engu til að standa undir kostnaði við framkvæmdir eða afborganir langtímaskulda. Niðrstöður árshlutauppgjörs fyrir fyrstu sex mánuði þessa árs sýna hallarekstur, neikvætt veltufé frá rekstri og aukningu skulda. Rekstrarniðurstaðan er tæpum 70 milljónum krónum lakari en fjárhagsáætlun gerði ráð fyrir. Þetta er á meðal þess sem kemur fram í nýrri greinargerð Grant Thornton endurskoðunar ehf vegna úttekar á fjárhagsstöðu sveitarfélagsins VogaHelstu niðurstöður úttektarinnar eru þær að rekstrarniðurstaða samantekins árshlutareiknings A og B hluta fyrir fyrstu sex mánuði ársins sýnir halla upp á 60,4 milljónir króna, samanborið við 8,9 milljón króna áætlaðan rekstrarafgang. Rekstrarniðurstaðan er því 69,3 milljónum krónum lakari en fjárhagsáætlun gerði ráð fyrir, segir í niðurstöðum úttektarinnar. Þar kemur fram að áætlun um tekjur standist nokkuð vel en hins vegar fara laun og tengd gjöld um 24% fram úr áætlun og annar rekstrarkostnaður um 14 % fram úr áætlun. Sömuleiðis fer fjármagnskostnaður verulega fram úr áætlun, m.a. vegna gengistaps og verðbótahækkana langtímalána umfram það sem gert var ráð fyrir.
Veltufé er neikvætt um tæpar 20 milljónir króna en samkvæmt samþykktri fjárhafsáætlun fyrir árið 2006 var gert ráð fyrir að það yrði jákvætt um rúmar 43 milljónir.
Heildarskuldir námu 613 milljónum samanborið við 514 milljónir í árslok 2005 og hækkuðu því um 99 milljónir frá ársbyrjun, segir í niðurstöðum Grant Thornton endurskoðunar. Þrátt fyrir sölu Stóru-Vogaskóla og Íþróttamiðstöðvarinnar á síðasta kjörtímabili hafa skuldir sveitarfélagsins ekki lækkað. Heildarskuldir ásamt núvirtum leigusamningum vegna fasteigna þann 30. júní 2006 námu samtals 1.569 m.kr. eða um 1.541 þús. kr. á hvern íbúa miðað við íbúafjölda í árslok 2005.
Grant Thornton endurskoðun bendir á að árlegar afborganir langtímalána sveitarfélagsins á næstu árum verði ekki undir 50-60 milljónum króna. miðað við óbreyttan lánstíma þeirra. Við það bætist að leigugreiðslur vegna ofangreindra fasteigna verða að lágmarki 70 milljónir kr. á ári næstu árin. Þótt tekjur sveitarfélagsins muni aukast á komandi árum samfara þeirri íbúafjölgun sem áætluð er, þá er fyrirsjáanlegt að reksturinn muni ekki geta staðið undir núverandi afborgunarbyrði langtímalána og leiguskuldbindinga, jafnvel þótt ekki verði um neinar framkvæmdir að ræða hjá sveitarfélaginu á næstu árum.
Ljóst er samkvæmt þessu að núverandi meirihluti bæjarstjórnar þarf að takast á við alvarlegan fjárhagsvanda á næstu misserum. Hætt er við fresta þurfi mörgum málum sem hann vildi koma í verk , samkvæmt því sem fram kemur í bókun frá síðasta bæjarstjórnarfundi.
Í bókun fulltrúa minnihlutans kom fram að munur á fjárhagsáætlun og uppgjöri fyrir fyrstu 6 mánuði ársins sé að stórum hluta tilkominn vegna starfsmats og áhrifa verðbólgu á fjármagnsliði.
