Vinna við lyftingu Guðrúnar Gísladóttur KE á að hefjast á morgun

Ásgeir Logi Ásgeirsson, sem stjórnar verkefninu sem lítur að því að lyfta Guðrúnu Gísladóttur KE af hafsbotni, segir í samtali við Lofotposten að í dag eigi kafarar frá Selöy undervannservice að vera komnir á staðinn og björgunaraðgerðirnar sjálfar hefjist á morgun. Í gær voru kafararnir þó ekki farnir að tygja sig til farar þar sem að nauðsynleg bankaábyrgð lá ekki fyrir.„Vinnan við að bjarga skipinu átti að hefjast fyrr en hið slæma veður í síðustu viku varð til þess að við ákváðum að gefa mannskapnum vikufrí en hann á að vera klár til að hefjast handa á föstudag“, segir Ásgeir Logi í samtali við Lofotposten


Samkvæmt heimildum blaðsins hafði Selöy undervannservice ekki fengið nauðsynlega bankaábyrgð til þess að óhætt væri talið að senda kafarana norður í Lófót. Einar Nordnes markaðsstjóri fyrirtækisins sagði að enn væri beðið eftir upplýsingum frá Íslendingunum en hann vildi ekki staðfesta að enn hefði ekki verið gengið frá bankaábyrgðinni.

Ásgeir Logi segir hins vegar að engin ljón séu í veginum. Tíminn hafi verið notaður til að fínpússa björgunaráætlunina og hann býst við köfurunum á staðinn í dag þannig að hægt verði að hefjast handa á morgun.

Fleiri fréttir á skip.is