Villtir ferðamenn við gosstöðvarnar

Björgunarsveitir á Suðurnesjum voru kallaðar út klukkan 18 í dag vegna tveggja villtra ferðamanna við gosstöðvarnar í Geldingardölum. Ferðamennirnir höfðu verið á gangi í 6 klukkutíma og höfðu villst af leið í þoku en gátu komið hnitum úr farsíma til björgunarsveita, þar sem þau voru í símasambandi.

Vel gekk að finna þá þar sem rétt um hálftíma síðar var björgunarsveitarfólk komið til þeirra og fylgdi þeim niður á bílastæði. Ferðamennirnir voru óslasaðir og nokkuð brattir og voru allir hópar komnir í hús rétt rúmlega sjö.