Viðbúnaður vegna komu Vítisengla

Búast má við spennuþrungnu andrúmslofti í Leifsstöð í dag þegar tugir Vítisengla frá öllum Norðurlöndunum munu reyna komast inn í landið, samkvæmt heimildum visir.is sem greinir frá þessu.

Mikill viðbúnaður er vegna væntanlegrar komu Vítisenglanna. Í gær gaf dómsmálaráðuneytið út tilskipun um að víkja frá Schengen-eftirlitinu tímabundið og taka upp landamæraeftirlit. Allir sem sem koma hingað til lands þurfa því að sýna vegabréf og breytir þá engu þó þeir séu frá aðildarríkjum Schengen.

Gripið er til þessara ráðstafana vegna innflutningsveislu sem Fáfnir boðar til í nýjum bækistöðvum sínum í Hafnarfirði nú um helgina. Hafði aðildarfélögum Vítisenglanna verið boðið til veislunnar.

Í yfirlýsingu frá dómsmálaráðuneytinu segir að litið sé á atburðinn sem ógnun við allsherjarreglu og þjóðaröryggi.

Þegar Víkurfréttir ræddu við lögregluna sagði varðstjóri að hún vildi ekki ræða málið, hvorki efnislega né hvers vegna hún vildi ekki tjá sig.
---

VFmynd: Mikið uppistand varð í Leifsstöð fyrir tveimur árum þegar norrænum Vítisenglum var vísað frá landinu.