„Við ætlum að klára þetta í kvöld“ - segir Sverrir Sverrisson

Sverrir Sverrirsson er einn af hinum fjölmörgu bakvörðum í liði Keflvíkinga. Hann hefur átt gott tímabil og var það mikill styrkur fyrir Keflavíkurliðið að endurheimta hann enda duglegur leikmaður sem gefur aldrei neitt eftir. Sverrir hefur leikið ágætlega gegn Grindvíkingum í úrslitakeppninni og verið að skora 10 stig í leik ásamt því að vera með um 5 stoðsendingar að meðaltali.
Hvernig leggst leikurinn í þig?
„Mjög vel, við förum til Grindavíkur og ætlum okkur að klára þetta í kvöld og munum leggja allt í sölurnar“.
Voru menn ekki tilbúnir í síðasta leik?
„Nei það er ekki hægt að segja það en við ætluðum okkur þó að klára þetta en það gekk ekki. Við spiluðum hörmulega vörn í leiknum sem sést best á því að þeir fengu að skjóta góðum skotum og spila eins og þeir vildu“.
Nú hefur aðalsmerki liðsins verið þriggjastigaskot en í þessu einvígi eru þau mjög fá miðað við vanalega og nýtingin fyrir neðan allar hellur, hvað er málið?
„Nei við höfum ekki verið að skjóta eins mikið af „þristum“ eins og vanalega en ég tel það vera styrk. Við unnum fyrstu tvo leikina án þess að skjóta mikið af þeim og því eigum við þetta vopn bara inni. Ef þeir fara að detta erum við í góðum málum. Grinvdvíkingar hafa hins vegar lagt mikið upp úr því að stöðva skytturnar og á meðan hefur annað verið opnara og við nýtum okkur það“.
Damon Johnson hefur verið að spila vel og sumir vilja segja að hann sé ástæðan fyrir góðu gengi liðsins ertu sammála því?
„Damon gerir auðvitað rosalega mikið fyrir liðið og við leitum mikið af honum. Hann getur nánast skorað að vild enda ráða Grindvíkingar lítið við hann. Hann er einnig mjög öflugur í því að opna fyrir aðra leikmenn liðsins og njótum við góðs af því. Það er hins vegar liðsheildin sem vinnur leiki en ekki einn leikmaður“.
Á að láta til sín taka í kvöld?
„Maður reynir auðvitað alltaf standa fyrir sínu. Við mætum brjálaðir til leiks og ætlum okkur að gefa allt í þetta og sigra. Við eigum mikið inni“.
Að lokum, ætlar þú að halda áfram í körfunni næsta vetur?
„Já ég geri ráð fyrir því enda hef ég mikinn áhuga á að spila áfram með Keflavík, sérstaklega ef sami þjálfarinn verður áfram. Annars er ég lítið að hugsa um þessi mál núna enda þetta tímabil enn í gangi“.