Verkfallið hefur strax áhrif: Unglingar virða ekki útivistartíma

Um helgina bar nokkuð á því að börn og unglingar á grunnskólaaldri væru úti seint að kvöldi í trássi við lög um útivistartíma. Lögreglan í Keflavík vísaði börnunum heim.

Af því má ráða að nýhafið verkfall grunnskólakennara sé þegar farið að hafa áhrif á daglegt líf nemenda þannig að þau eru lengur úti á kvöldin þar sem enginn skóli er morguninn eftir.

Í téðum lögum er skýrt tekið fram að börn 12 ára og yngri mega ekki vera á almannafæri eftir kl 20.00 nema í fylgd með fullorðnum. Börn á aldrinum 13-16 ára skulu ekki vera á almannafæri eftir klukkan 22.00, enda séu þau ekki á heimferð frá viðurkenndri skóla-, íþrótta- eða æskulýðssamkomu. Á tímabilinu 1. maí til 1. september lengist útivistartími barna um tvær klukkustundir.

Aldursmörk þessa ákvæðis miðast við fæðingarár en ekki fæðingardag.
Myndin er úr safni VF og tengist málinu ekki