Verður hæsta hús Keflavíkur

Byggingarframkvæmdir við hæsta hús á Suðurnesjum hefst að öllum líkindum í haust. Róbert Svavarsson hjá Fídon ehf. hefur fengið byggingarleyfi fyrir 6-7 hæða húsi við Vatnsnesveg 29 í Keflavík.Að sögn Róberts verða 25 íbúðir í húsinu sem er sex og hálf hæð. Stærð íbúðanna er frá 90 til 142 fermetrar og eru fjórar íbúðir á hverri hæð. Húsið verður einum metra hærra en „Stóra blokkin“ sem er um 200 metrum ofar í bænum. Hverri íbúð fylgir bílageymsla sem verður undir húsinu en auk þess verða 25 bílastæði í kringum húsið. Róbert segir að svona íbúðir hafi vantað á fasteignamarkaðinn. „Ég tel að það hafi vantað íbúðir fyrir þá sem eru að fara úr stærri eignum en vilja vera áfram í veglegum íbúðum með minnsta viðhaldi. Þetta hús verður byggt með það í huga. Íbúðirnar verða með stórum stofum og svölum og verður skilað fullfrágengnum. Gólfplötur í húsinu verða hljóðeinangraðar en ekkert hús hér á svæðinu er þannig byggt. Þá geta kaupendur sem ákveða sig snemma, komið inn á byggingarstigi og haft áhrif á gólfefni og innréttingar“, sagði Róbert.
Að sögn Róberts hafa byggingaráform hans spurst út og segist hann hafa fundið fyrir miklum áhuga hjá mörgum.