Veistu kólesterólgildi þitt? Ókeypis mæling í HSS á laugardaginn

Þann 11. september n.k., kl. 10 – 14 verður Suðurnesjamönnum og konum boðin ókeypis kólesterólmæling á Heilbrigðisstofnun Suðurnesja, Skólavegi 8 í Keflavík. Mælingin verður gerð með nýjum mælum, CardioChek, sem reynst hafa vel og hlotið viðurkenningu í Bandaríkjunum. Mælingarnar eru skipulagðar af Félagi hjartasjúklinga á Suðurnesjum og Landssamtökum hjartasjúklinga í samvinnu við heilsugæsluna og lyfjafyrirtækið AstraZeneca.

Fjölmargar rannsóknir á undanförnum árum hafa sýnt fram á hve nauðsynlegt er að lækka kólesteról til að koma í veg fyrir hjarta- og æðasjúkdóma. Lækkun kólesteróls (blóðfitu) er einn mikilvægasti hlekkurinn í forvörnum á því sviði. Með hollu mataræði og hreyfingu má ná ákveðnum árangri, en oft þarf að grípa til lyfjameðferðar til að lækka kólesteról.

Þekkir þú þitt kólesteról? Ef ekki er kjörið tækifæri að líta við á HSS laugardaginn 11. september. Skráning í mælingarnar hefst kl. 10 og munu mælingarnar standa fram til kl. 14. Heilbrigðisstarfsfólk annast mælingarnar og veitir upplýsingar og ráðleggingar. Kl. 11 og kl 13 verður fyrirlestur um Mikilvægi meðferðarheldni, sem þátttakendum í mælingunum verður boðið uppá. Að mælingum loknum mun AstraZeneca færa Heilbrigðisstofnun Suðurnesja CardioChek kólesteróli mæli að gjöf.