Veikindi settu fjárhaginn í rúst
-vinir og velunnarar Árna Einarssonar og Guðbjargar Kristinsdóttur taka höndum saman til aðstoðar fjölskyldunni - opnaður hefur verið söfnunarreikningur nr. 1191-05-401420, kt. 310757-3579. Flest fáum við okkar skammt af mótlæti á lífsleiðinni og sumir reyndar meira en aðrir að því er virðist stundum.
Það er margt sem getur farið úrskeiðis í lífi sérhvers manns en flestu er hægt að vinna sig út úr ef fólk hefur heilsuna. Heilsubrestur er hins erfiðari við eiga því hann hefur áhrif á svo margt annað í lífi fólks, t.a.m. fjárhagslega afkomu.
Þetta þekkja þau Árni Einarsson og Guðbjörg Kristinsdóttir, sem hafa heldur betur staðið með storminn í fangið síðustu misseri vegna heilsubrests þeirra beggja. Bæði eru þau af Suðurnesjum en hafa verið búsett í Danmörku um árabil. Vinir og velunnarar þeirra hér heima hafa ákveðið að koma fjölskyldunni til hjálpar með því að opna söfnunarreikning.
Áföll á áföll ofan
Árni hefur átt við alvarlega og þráláta bakveiki að stríða og hefur fjórum sinnum þurft að fara í aðgerð vegna brjóskloss. Hann hefur verið með öllu óvinnufær vegna þess síðan í júní á síðasta ári en Árni er vélsmiður að mennt og vann hjá Volvo verksmiðjunum við smíði á vélskóflum.
En áfallasögu þeirra hjóna var ekki lokið, vegna þess að í desember síðastliðnum kom í ljós að Guðbjörg var með gúlp við aðalslagæðina og fór hún í aðgerð vegna þess þann 16. þess mánaðar. Í ofanálag uppgötvaðist að Guðbjörg var komin með heilaæxli og var það fjarlægt í aðgerð sem hún gekkst undir í febrúar.
Að sögn Guðbjargar eru batahorfur hennar nokkuð góðar en hún hefur verið í geisla- og lyfjameðferðum síðustu vikur og mánuði, sem virðast vera að skila árangri.
Það er því óhætt að segja að á ýmsu hafi gengið í lífi þeirra hjóna. Guðbjörg lenti í alvarlegu bílslysi á Grindavíkurvegi þegar hún var tæplega 17 ára og slasaðist lífshættulega. Síðan þá hefur hún verið öryrki.
Treysta á aðstoð sinna nánustu
Vegna veikindanna hefur Árni verið frá vinnu lengi og óvíst er með öllu hvort hann verði vinnufær í framtíðinni. Veikindi þeirra beggja hafa sett fjárhag fjölskyldunnar í rúst, bæði vegna tekjumissis og lækniskostnaðar. Til að sjá fyrir heimilinu hafa þau þurft að treysta á aðstoð sinna nánustu upp á síðkastið. Árni og Guðbjörg eiga saman tvo stráka, sá eldri er tvítugur en sá yngri er í fyrstu bekkjum grunnskóla.
Þeir vita það sem þekkja af eigin raun hve langvarandi mótlæti og áhyggjur geta verið andlega slítandi en samt er engin uppgjafartónn í Árna og Guðbjörgu, ekki síst vegna þeirrar vissu að heima á Íslandi eru vinir og velunnarar að setja af stað söfnun til að aðstoða fjölskylduna.
„Við erum afskaplega þakklát að vita að fólk er að hugsa til okkar. Það er gott að vita að maður á góða að þegar syrtir í álinn. Það er huggun harmi gegn að við eigum ekki hús hér, heldur leigjum við. Annars værum við örugglega búin að missa allt“, sagði Guðbjörg í samtali við VF.
Árni vann í Slippnum í Njarðvík á árum áður og eignaðist þar marga góða félaga og vini, sem nú hafa tekið höndum saman og efnt til söfnunar til að styðja við fjölskylduna í erfiðleikunum. Í því skyni hafa þeir stofnað söfnunarreikning í nafni Árna Einarssonar í Sparisjóðnum í Njarðvík þar sem fólk getur lagt inn frjáls framlög til stuðnings fjölskyldunni.
Númer hans er: 1191-05-401420, kt. 310757-3579.
