Veður: Snjókoma suðvestanlands síðdegis á morgun

Í morgun kl. 06 var norðaustanátt, 15-20 m/s við norðvesturströndina en víða 10-15 annars staðar. Él voru norðan- og austanlands og frost víðast hvar, mest 11 stig á Möðrudal og í Svartárkoti.

Veðurhorfur á landinu næsta sólarhring:
Norðaustan 10-18 m/s, hvassast norðvestantil á landinu. Él norðan- og austanlands, en bjartviðri sunnan- og suðvestanlands. Lægir heldur er líður á daginn. Norðaustan 5-13 í fyrramálið, hvassast á Vestfjörðum, en vaxandi austlæg átt suðvestanlands á morgun. Dálítil él á Norður- og Austurlandi, en þykknar upp suðvestantil. Austan 10-15 m/s og snjókoma suðvestanlands síðdegis á morgun. Kólnandi veður, frost 5 til 15 stig í kvöld og á morgun, kaldast í innsveitum norðaustanlands.

Veðurhorfur við Faxaflóa næsta sólarhring: Norðaustanátt, víða 10-15 m/s en hægari vindur síðdegis. Skýjað með köflum og frost 2 til 10 stig, kaldast í nótt.