Veður: Norðaustan 15-23 m/s og skýjað

Í morgun kl. 06 var norðaustanátt á landinu, 18-23 m/s við norðurströndina og sums staðar vestanlands en víða 10-15 annars staðar. Snjókoma var á norðanverðu landinu og dálítil rigning austast. Hlýjast var 6 stiga hiti á Fagurhólsmýri, en kaldast 4ra stiga frost á Flateyri.

Veðurhorfur á landinu næsta sólarhring:

Viðvörun: Búist er við stormi (meira en 20 m/s) víða um land.
Norðaustanátt, víða 18-23 m/s. Snjókoma eða él norðan- og austanlands, annars skýjað og úrkomulítið. Dregur úr vindi og éljum í kvöld og nótt, norðaustan 10-15 og dálítil él norðan- og austanlands á morgun, en annars léttskýjað. Kólnandi veður, frost 2 til 9 stig síðdegis á morgun.

Veðurhorfur við Faxaflóa næsta sólarhring: Norðaustan 15-23 m/s og skýjað. Norðaustan 13-18 í kvöld, en hægari í nótt. Kólnandi, frost 1 til 5 stig í kvöld.