Veður: Bjartviðri á morgun

Í kvöld kl. 18 var norðlæg átt, víða 10-15 m/s og snjókoma eða él, en léttskýjað sunnanlands. Hlýjast var 2ja stiga hiti í Seley, en kaldast 8 stiga frost norðan til.

Veðurhorfur á landinu næsta sólarhring:
Norðvestlæg átt, víða 10-15 m/s, en 15-20 norðaustanlands. Snjókoma eða él á norðanverðu landinu, en léttskýjað sunnan til. Lægir smám saman og rofar til norðanlands í nótt. Norðaustlæg átt, víða 3-8 m/s á morgun, en 8-13 vestan til. Yfirleitt bjartviðri á morgun, en dálítil él norðan til. Frost yfirleitt 3 til 10 stig, kaldast til landsins.

Veðurhorfur við Faxaflóa til kl. 18 á morgun: Norðvestan 10-15 m/s og stöku él, en lægir smám saman og léttir til. Norðaustan 5-10 og bjartviðri á morgun, en 8-13 síðdegis. Frost 4 til 10 stig, kaldast í uppsveitum.

Veðurhorfur á höfuðborgarsvæðinu næsta sólarhring: Norðlæg átt, 8-13 m/s, en austan 5-8 á morgun. Stöku él framan af kvöldi, en annars bjartviðri. Frost 4 til 9 stig.