Varalið BS fullmannað í Vogum

Brunavarnir Suðurnesja hafa ráðið til sín sex einstaklinga í varalið slökkviliðsins með aðsetur í Vogum. Fyrir var einn einstaklingur búsettur í Vogum í varaliðinu.

Brunavarnir Suðurnesja héldu á dögunum kynningarfund fyrir áhugasama, þar sem starfsemin var kynnt og einstaklingar hvattir til að kynna sér þann valkost að sækja um inngöngu í varalið / útkallslið í Vogum.

Við tekur þjálfun og annar undirbúningur þessa hóps, sem nú kemur til liðs við BS.

„Það er einnig ánægjulegt að geta þess að meðal hinna nýju varaliðsmanna er ein kona, en einungis starfar ein kona hjá BS. Þetta er því kærkomin viðbót,“ skrifar Ásgeir Eiríksson, bæjarstjóri í Vogum í vikulegum pistli sínum.

Brunavarnir Suðurnesja hafa nú varanlega staðsettan slökkvibíl í nýrri þjónustumiðstöð Sveitarfélagsins Voga.