Valdimar söngvari ársins

Valdimar Guðmundsson var kjörinn söngvari ársins í popp og rokktónlist á Íslensku tónlistarverðlaununum sem fram fóru í Silfurbergi í Hörpu í kvöld. Bein útsending var frá hátíðinni á RÚV. Valdimar var stuttorður en gagnorður þegar hann tók við verðlaununum og sagði: „Ég vil bara þakka öllum. Þið vitið hver þið eruð.“

Hljómsveitin Valdimar var með þrjár tilnefningar til Íslensku tónlistarverðlaunanna fyrir árið 2014. Hljómsveitin var tilnefnd fyrir plötu ársins í flokknum popp, fyrir plötuna Batnar útsýnið. Valdimar Guðmundsson söngvari var tilnefndur sem söngvari ársins, en hann og Ásgeir Aðalsteinsson voru einnig tilnefndir sem textahöfundar ársins.

ATP-hátíðin var tilnefnd sem einn af tónlistarviðburðum ársins 2014 en hlaut ekki verðlaun að þessu sinni.

Þegar fulltrúi Skálmaldar tók við verðlaunum sem tónlistarflytjandi ársins í rokktónlist, vitnaði hann í Rúnna Júl okkar Suðurnesjamanna og sagði: „Þetta er allt saman rokk'n'roll.“