Útför Ragnars Arnar í dag

Útför Ragnars Arnar Péturssonar, fyrrverandi íþróttafulltrúa Reykjanesbæjar, var gerð frá Keflavíkurkirkju í dag. Ragnar Örn lést á Heilbrigðisstofnun Suðurnesja föstudaginn 29. apríl sl. eftir skammvinna baráttu við krabbamein.

Ragnar Örn starfaði sem íþróttafulltrúi Reykjanesbæjar í nær 20 ár. Hann var ötull þátttakandi í íþróttastarfi Reykjanesbæjar og átti sæti í íþróttaráði Keflavíkur frá 1986 til 1998. Hann var formaður Íþróttabandalags Keflavíkur frá árinu 1994 til 1998. Ragnar Örn var varabæjarfulltrúi fyrir Sjálstæðisflokkinn í Keflavík frá 1990 til 1994 og starfaði fram til dánardags fyrir Sjálstæðisflokkinn í Keflavík og var formaður Fulltrúaráðs flokksins. Ragnar Örn var formaður Starfsmannafélags Suðurnesja í 14 ár frá 1999 til 2013 og sat þau ár einnig í stjórn BSRB. Ragnar Örn var virkur meðlimur Kiwanis-hreyfingarinnar og gegndi þar fjölmörgum trúnaðarstörfum, þar á meðal var hann umdæmisstjóri hreyfingarinnar á Íslandi og í Færeyjum frá árinu 2011 til 2012 og sat í Evrópustjórn þann tíma.

Ragnar Örn lætur eftir sig eiginkonu og fjögur uppkomin börn og 10 barnabörn.