Úrelt gervigras í Reykjaneshöll?

Gervigrasið í Reykjaneshöll er ekki boðlegt lengur og menn eru farnir að leita annað til æfinga.
Þetta kom fram í máli Ólafs Thordersen, bæjarfulltrúa S-listans, á bæjarstjórnarfundi í Reykjanesbæ í gær en snörp orðaskipti urðu um þetta á fundinum.

Ólafur fullyrti að samningur sá sem bæjarfélagið gerði um leigu á höllinni „væri sá vitlausasti sem um getur“ og spurði hvort það væri á kostnað bæjarins að gera nauðsynlegar úrbætur á ástandi hallarinnar. Kom fram í svari meirihlutans að þar sem ekki væri um galla að ræða heldur viðhald, félli slíkur kostnaður á sveitarfélgið. Gervigrasið væri orðið 6 ára gamalt og enn boðlegt sem slíkt, enda hefði það átt að hafa 10 ára endingartíma. Hins vegar hefði mikil framþróun orðið í framleiðslu og þróun slíkra efna á undanförnum árum og samanborið við það mætti álykta að mörgum fyndist það ekki boðlegt lengur.
Á síðasta fundi Menningar- íþrótta- og tómstundaráðs lá fyrir erindi frá knattspyrnudeildum Keflavíkur og Njarðvíkur varðandi þetta mál og er óskað eftir því að þessi mál verði skoðuð. Ráðið samþykkti að aflað yrði upplýsinga um nýungar i gervigrasi og áætluðum kostnaði við að skipta um það í Reykjaneshöll.  Einnig að kannaðir verði möguleikar á því að selja gervigrasið sem fyrir eða nýta það utanhúss í bæjarfélaginu.