Undir áhrifum fíkniefna á ótryggðum bílum

Lögreglan á Suðurnesjum stöðvaði í nótt för ökumanns vegna gruns um að hann æki undir áhrifum fíkniefna.  Sýnatökur staðfestu neyslu hans á kannabis og amfetamíni. Að auki var bifreiðin sem hann ók ótryggð og voru skráningarnúmerin fjarlægð af henni.

Annar ökumaður, sem lögregla stöðvaði hafði neytt kannabisefna og var á ótryggðri bifreið. Þriðji ökumaðurinn ók bifreið sem ljóslaus var að aftan. Lögregla hafði afskipti af honum og fundust fíkniefni á mælaborði bifreiðarinnar og á gólfi hennar. Þrír farþegar voru í bifreiðinni og stæk kannabislykt barst úr henni. Voru þeir handteknir, ásamt ökumanni, sem hafði neytt kannabis og amfetamíns, að því er sýnatökur staðfestu. Loks var einn ökumaður handtekinn vegna ölvunaraksturs.