Umsátursástand í Grindavík

Lögreglan var með mikinn viðbúnað í Grindavík í kvöld og fram á nótt. Borgarhrauni og nærliggjandi götum var lokað þar sem einstaklingur í ójafnvægi var með skotvopn í húsi við Borgarhraun.

 

Farið var í hús og fólk beðið um að vera innandyra og lögreglumenn vísuðu fólki í burtu sem var í sjónlínu við íbúðarhúsið.

 

Ekki hafa fengist upplýsingar hvort maðurinn var einn í húsinu eða hvað varð til þess að lögregla var kölluð út en fjölmennt lögreglulið frá lögreglunni á Suðurnesjum og sérsveit ríkislögreglustjóra var á staðnum. Umsátrið hófst um kl. 21 á laugardagskvöld en verulega var dregið úr umfangi lögregluaðgerðarinnar rétt fyrir kl. 01 í nótt en þá má gera ráð fyrir að maðurinn hafi verið handtekinn.

 

Sjúkrabifreið stóð vakt við verkalýðshúsið í Grindavík í allt kvöld á meðan umsátrinu stóð.

 

Lögregla var meðal annars með dróna á lofti og lítið vélmenni á beltum.

 

Meðfylgjandi myndir tók ljósmyndari Víkurfrétta á mótum Borgarhrauns og Víkurbrautar en atburðarásin átti sér stað neðar í götunni.