Ummerki um skemmdir við hreyfil Icelandairþotu

Rannsóknarnefnd flugslysa rannsakar nú flugatvik þegar flugvél Icelandair varð að snúa aftur inn til lendingar eftir að gangtruflanir höfðu orðið í öðrum motor vélarinnar í flugtaki frá Keflavíkurflugvelli í gær, sunnudag. Vélinni var lent aftur vandræðalaust eftir um 11 mínútna flug.

Flugstjóri vélarinnar varð var við gangtruflanir í hreyfli við flugtak og ákvað að lenda vélinni aftur. Var því fullur viðbúnaður á vellinum er vélin lenti. Enginn um borð mun hafa meiðst og gekk lendingin vel.

Þetta er annað atvikið í júlímánuði að hreyfilbilun verður í flugvél Icelandair. Þann 10. júlí þurfti að slökkva á öðrum hreyfli vélar sem var að koma til landsins frá Amsterdam. Sú lending gekk einnig vandræðalaust. Í báðum tilvikum voru björgunarsveitir kallaðar út á þeim forsendum að um hættustig væri að ræða, en samvæmt fréttum fengu um 1000 björgunar- og viðbragðsaðilar útkall á sunnudaginn.

Í fréttum Ríkisútvarpsins í dag segir að ummerki séu um skemmdir á hreyfli Icelandair-þotunnar sem snúið var aftur til lendingar skömmu eftir flugtak af Keflavíkurflugvelli í gær. Skemmdirnar eru fremst og aftast á hreyfilhúsinu sem bendir til að eitthvað hafi sogast inn í það og spýst út að aftan. Ekki liggur fyrir hvað þetta var né heldur hvort það fór í sjálfan hreyfilinn eða meðfram honum.

Víkurfréttamyndir: Hilmar Bragi Bárðarson