UMFN þarf að sigra Keflavík
Fyrsti sigur Tindastóls í Keflavík Sauðkræklingar geta þakkað hæfileikum Shawn Myers og stuttum þræði þeirra Fannars Ólafssonar og Leifs Garðarssonar fyrsta sigurleik Tindastóls í Keflavík frá því að Sauðkræklingar komust í efstu deild fyrir meira en áratug síðan. Leikurinn var í járnum þegar augnabliks einbeitingarleysi kostaði Fannar fjórðu villuna. Piltur var ekki sáttur og fussaði á ákvörðun Leifs Garðarssonar, dómara, sem gaf Fannari ekki einu sinni sekúndubrot til að ná stjórn á tilfinningum sínum heldur skellti framan í hann fimmtu villunni í formi tæknivítis. Fannar hafði verið besti leikmaður Keflvíkinga fram að þessu og án hans máttu þeir sín lítils gegn Shawn Myers sem tók leikinn í sínar hendur. Fóru leikar 67-80. Á sunnudag hefndu Keflvíkingar sín á Skagamönnum og sigruðu þá með 77 stiga mun 63-143 í leik sem verður aðeins minnst fyrir að Elentínus Margeirsson var eini Keflvíkingurinn sem skoraði minna en tíu stig Síðasta umferðin í kvöld Í kvöld verður leikin síðasta umferð EPSON-deildarinnar og þrátt fyrir aðmörg lið sigli lygnan sjó er enn hörkubarátta á mörgum vígstöðvum. Grindvíkingar og Sauðkræklingar berjast um annað til 4. sætið í Grindavík og í Borgarnesi kljást heimamenn við nýliða Hamars um síðasta sætið í úrslitakeppninni. Verðlaunin verða jarðarför í tveimur leggjum gegn Njarðvík eða Haukum. Þá má ekki gleyma því að Keflvíkingar geta lagt þungan stein í götu nágranna sinna Njarðvíkinga. Með því að sigra þá í kvöld geta þeir sent þá alla leið niður í 4. sæti., úr toppsætinu. Er of seint að setja upp girðingu á milli byggðarlaganna fyrrverandi, Keflavíkur og Njarðvíkur? Grindvíkingar í dansi Þrátt fyrir meiðsl lykilleikmanna gefa Grindvíkingar ekkert eftir á okasprettinum og sigruðu þeir Snæfell og KFÍ örugglega í vikunni. Þeim bíður erfitt verkefni í síðustu umferðinni því í kvöld mætir Tindastólsliðið í Röstina en Sauðkræklingar geta einmitt náð Grindvíkingum að stigum sigri þeir í Grindavík. 10 daga NBA samningur? Jackson Glover kom í heimsókn til Keflavíkur í síðustu viku. Hann fer heim í þessari viku. Keflvíkingar náðu sér í nýjan útlending í síðustu viku er ofangreindur fyrrverandi Harlem Globetrotter var ráðinn í stað Jasons Smith. Ekki sýndi hann neina stjörnutakta í fyrstu tveimur leikjum sínum með liðinu og var hann einna líkastur Ívari Webster að líkamsburðum. Samkvæmt heimildum blaðsins leikur Jackson sinn síðasta leik gegn Njarðvík í kvöld. Deildarmeistaratitillinn Njarðvíkingar náðu inn fjórum skyldustigum í síðustu viku, unnu KR og Borgarnes örugglega, og þurfa nú aðeins að sigra Keflavík í kvöld til að tryggja sér deildarmeistaratitilinn og heimaleikjaréttinn í úrslitakeppninni. Nýju leikmennirnir, Bandaríkjamaðurinn Riley Inge og Logi Gunnarsson, eru að komast inn í leik liðsins og liðið hreint út sagt óárennilegt bæði í sókn og vörn. Njarðvíkingar verða að teljast sigurstranglegri í kvöld. Þeir hafa allt að vinna á meðan sigur breytir litlu fyrir Keflvíkinga, þeir þurfa að hefja leik á útivelli í úrslitakeppninni og vita að enga hlakkar til að fá þá í heimsókn.
