Umfang gossins er lítið

Gosið afmarkað í dalverpi og ólíklegt að hraunflæði komi til með að valda tjóni.

Umfang gossins er lítið og hefur virkni heldur minnkað frá því í gærkvöldi. Lítið er um kvikustróka upp úr sprungunni og þekur hraunflæðið svæði sem er í mesta lagi um 100 metra breitt, en unnið er að kortlagningu svæðisins.

Eins og staðan er núna er gosið afmarkað við mjög lítið svæði ofan í dalverpi og er afar ólíklegt að hraunflæði komi til með að valda tjóni.

Engin gosaska mælist frá eldstöðvunum og miðað við fyrsta mat er ekki mikil hætta á að gasmengun komi til með að valda miklum óþægindum nema næst gosstöðvunum.

Fylgst verður náið með þróun mála sérstaklega hvað varðar gasmengun.

Í frétt frá Veðurstofu Íslands segir að mikilvægt er að taka það fram að svæðið næst gosstöðvunum er hættusvæði og alls ekki ráðlegt að vera á ferðinni þar. Í landslaginu er mikið um lægðir þar sem gas gæti leynst og verið hættulegt fólki.