Tvö handtekin og ein flutt á sjúkrahús
- mikill viðbúnaður hjá lögreglu og sjúkraliði við Hafnargötu í Keflavík
Lögreglan á Suðurnesjum gat engar upplýsingar veitt um atvik í húsnæði við Hafnargötu í Keflavík, Reykjanesbæ, nú síðdegis, þegar Víkurfréttir leituðu upplýsinga. Mikill viðbúnaður var hjá lögreglu. Fjórar merktar lögreglubifreiðar voru sendar á vettvang með forgangi og sjúkrabifreið frá Brunavörnum Suðurnesja.
Fljótlega var kona færð úr húsinu í járnum í lögreglubifreið sem flutti konuna á lögreglustöðina við Hringbraut. Skömmu síðar fóru sjúkraflutningamenn inn í húsið og komu út með konu á sjúkrabörum. Hún var flutt á Heilbrigðisstofnun Suðurnesja.
Sjónarvottur á vettvangi sagði í samtali við Víkurfréttir að skömmu síðar hafi annar einstaklingur verið leiddur út í járnum og að fulltrúar rannsóknardeildar lögreglunnar væru komnir á vettvang.
Fjölmargir vegfarendur fylgdust með á vettvangi, enda viðbúnaður lögreglu mikill og fjöldi lögreglumanna á vettvangi og a.m.k. fjórir merktir lögreglubílar.
Meðfylgjandi myndir voru teknar á vettvangi nú áðan.
VF-myndir: Hilmar Bragi
Einn einstaklingur var fluttur út úr húsnæðinu á sjúkrabörum.
Mikill viðbúnaður var á vettvangi.
Lögreglubifreið ekur á brott með hina handteknu.
