Tvímilljónasti farþegi Icelandair á árinu
- hlaut tvær milljónir vildarpunkta. Fær tugi utanlandsferða fyrir punktana.
Icelandair flutti í gærdag 2 milljónasta farþegann á árinu. Farþeginn reyndist vera Þórunn Anna Karlsdóttir, sem var á leið til Boston, með flugi Icelandair FI631, sem fór frá Keflavíkurflugvelli kl. 17.00 síðdegis í gær. Birkir Hólm Guðnason, framkvæmdastjóri Icelandair, afhenti henni glaðning við innritun í flugið; blómvönd og tvær milljónir vildarpunkta Saga Club.
Þetta er í fyrsta sinn í 75 ára sögu Icelandair sem farþegafjöldinn í áætlunarflugi fer yfir tvær milljónir á einu ári. Eldra metið var sett á síðasta ári þegar farþegar voru tæplega 1,8 milljónir. Samkvæmt áætlunum félagsins fyrir árið 2013 mun farþegum fjölga um 300 þúsund og verða um 2,3 milljónir á næsta ári. Farþegafjöldi Icelandair hefur vaxið mjög á undanförnum árum eftir samdráttinn sem varð 2008 og 2009 vegna efnahagshrunsins.
Nokkur umræða hefur orðið að undanförnu, m.a. á samfélagsmiðlum, um það hvernig rétt sé að segja 2 milljónasti farþeginn. Flestir virðast á þeirri skoðun að einfaldast og fallegast sé að nota orðið „tvímilljónasti“ frekar en aðra kosti, s.s. tvö milljónasti, tvær milljónasti, tveggja milljónasti eða annar milljónasti.
