Tveir sviptir á staðnum fyrir glæfraakstur í íbúðabyggð

Í dag voru lögreglumenn við hraðamælingar á Ásbrú. Fylgst var sérstaklega með umferð um Skógarbraut, en þar er meðal annars leikskóli og íbúðabyggð. Á svæðinu gildir 30 km hámarkshraði.

Alls voru 18 ökumenn stöðvaðir og kærðir fyrir of hraðan akstur. Af þeim voru tveir sviptir ökuréttindum á staðnum, en þeir óku á 64 og 66 km hraða. Þá voru aðrir tveir einnig grunaðir um akstur undir áhrifum fíkniefna og einn undir áhrifum áfengis.

Flestir þeirra sem voru kærðir voru ýmist íbúar á svæðinu eða foreldrar að sækja börn í leikskóla.

„Þessi niðurstaða er algjörlega óviðunandi og eru ökumenn minntir á að virða reglur um hámarkshraða,“ segir í tilkynningu lögreglu.

Lögreglan á Suðurnesjum mun halda uppi frekara eftirliti við skóla og leikskóla á næstunni.