Tveir drengir í Reykjanesbæ skemmdu bíla

Lögreglan á Suðurnesjum fékk tilkynningu um tvo drengi að skemma bifreiðar með því að ganga yfir þær.  Þeir komust undan eiganda einnar bifreiðarinnar sem hafði reynt að hlaupa þá uppi. Á vef lögreglunnar kemur fram að vitað er hverjir drengirnir eru og verður haft tal af þeim síðar. 

Lögreglan hafði afskipti af tveimur félögum drengjanna sem einnig höfðu verið á staðnum, en þó ekki viðriðnir skemmdarverkin. Voru þeir ölvaðir og höfðu nokkuð af áfengi meðferðis.  Foreldrum var gert að sækja þá á lögreglustöðina.

 

Önnur verkefni lögreglunnar tengdust kvörtunum vegna hávaða og ölvunar í heimahúsum í öllum sveitarfélögunum á svæðinu. Ölvaður maður var handtekinn í Grindavík eftir ólæti. Ógnaði mönnum með hníf og skemmdi bifreið. Hann var vistaður í fangageymslu.Ein líkamsárás varð kærð og átti hún sér stað á einum skemmtistaðanna.

Ofurölvi ökumaður bifreiðar var handtekinn í miðbæ Keflavíkur í gærkvöld.  Hann er einnig grunaður um að hafa verið undir áhrifum fíkniefna við stjórn á bifreið sinni. Annar ökumaður var kærður fyrir of hraðan akstur innanbæjar í Keflavík, en hann mældist á 81 km hraða.

Af  vef lögreglunnar.