Tveimur bifreiðum stolið

Tveimur bifreiðum var stolið í Reykjanesbæ í gærkvöldi og í nótt. Um klukkan níu í gærkvöldi var bifreið stolið í Njarðvík. Lögreglumenn í Hafnarfirði urðu síðan bifreiðarinnar varir við Öldugötu í Hafnarfirði og náðu bílþjófnum á hlaupum.Þá var bifreið stolið þar sem hún stóð í lausagangi fyrir utan hús í Keflavík. Eigandi bílsins hafði brugðið sér frá í nokkrar mínútur, en þegar hann ætlaði að vitja um bifreið sína að nýju var hún horfin. Bíllinn fannst nokkru síðar og vegfarandi gat gefið greinargóða lýsingu á þeim sem var á bílnum. Hann reyndist ölvaður og gistir nú fangageymslur lögreglunnar í Keflavík.