Tvær tillögur um verndun vatnsbóla

Aðalfundur SSS samþykkti ályktun um að þrýsta á þar til bær stjórnvöld að banna olíuflutninga um Reykjanesbraut og Grindavíkurveg auk þess sem umhverfisráðherra fékk fyrirspurn um bann við olíuflutningum um Grindavíkurveg. Í framhaldi af ályktun fundarins hafa tvær þingsályktunartillögur verið lagðar fram fyrir Alþingi. Önnur tillagan er frá Hjálmari Árnasyni og Sigríði Jóhannesdóttur en þar er farið fram á að olíuflutningur verði alfarið bannaður. Hin tillagan er frá Kristjáni Pálssyni og Árna Ragnari Árnasyni. Þar er farið fram á að umhverfisráðherra verði falið að gera þær ráðstafanir við Grindavíkurveg að vatnsbólum Suðurnesjamanna stafi ekki hætta af olíuflutningum eftir veginum.
Hjálmar Árnason var upphafsmaður fyrri tillögunnar og bauð hinum þingmönnum Suðurnesja að vera meðflutningsmenn. Eins og fyrr sagði samþykkti Sigríður Jóhannesdóttir að vera með en Árni Ragnar og Kristján ákváðu að fara mildari leið. „Hversvegna þeir völdu þá leið að víkja frá samþykki aðalfundarins veit ég ekki. Hitt tel ég hins vegar morgunljóst að samstaða um málið hefði verið eðlilegri meðal þingmanna og í samræmi við aðalfund SSS þar sem allir sveitarstjórnarmenn greiddu atkvæði með því að banna flutningana“, sagði Hjálmar þegar blaðamaður hafði samband við hann vegna málsins. Í tillögu Hjálmars og Sigríðar segir: „Alþingi ályktar að fela dómsmálaráðherra að grípa til ráðstafana sem banna flutning jarðefnaeldsneytis eftir Reykjanesbraut.“ Þeir Kristján og Árni Ragnar velja aðra leið en í þeirra tillögu segir: „Alþingi ályktar að fela umhverfisráðherra að gera þær ráðstafanir við Grindavíkurveg að vatnsbólum Suðurnesjamanna stafi ekki hætta af olíuflutningum eftir veginum.“ Í þeirri tillögu er farið fram á að viðvörunarskiltum verði komið upp þar sem vegfarendur eru beðnir um að sýna aðgát. „Þarna er um að ræða starfsemi sem er rekin á viðskiptalegum forsendum og það hefur sýnt sig að olíufélögin byggja ekki upp hafnaraðstöðu á Suðurnesjum verði flutningur bannaður heldur þurfa skip frá Suðurnesjum að sækja sína olíu til Hafnarfjarðar eða Reykjavíkur“, segir Árni Ragnar Árnason, þingmaður. Hann bendir einnig á það að framtíðarvatnsból séu ekki í hættu vegna slysa á Reykjanesbrautar. „Eina vatnsbólið við Reykjanesbraut er vatnsból Vatnleysustrandarhrepps og það verður fljótlega tengt við vatnbólið í Gjánni við Svartsengi og það vatnsból viljum við tryggja.“ Margar tillögur vegna Hvalfjarðarganga hafa verið fluttar á Alþingi en leiðin sem þar var valin var ekki að banna olíuflutninga alfarið heldur leyfa þá á ákveðnum tímum og með viðeigandi öryggisráðstöfunum. „Það er hugsanlegt að það hefði verið betra að sameinast um tillöguna en við viljum gera málinu til góðs og bann er ekki neinum til góðs því aðrir flutningar eru leyfðir“, segir Árni Ragnar að lokum.