Töluverður eldur á flughlaði á Keflavíkurflugvelli

Eldur kom upp í tæki, svokölluðu sameyki, sem notað er til að sópa og hreinsa flugbrautir og flughlöð á Keflavíkurflugvelli í morgun. Talsverður eldur logaði í tækinu þegar það var að störfum nærri nýju austurbyggingu flugstöðvar Leifs Eiríkssonar um klukkan tíu í morgun.

Slökkvibílar flugvallarþjónustu Isavia voru fljótir á vettvang og var eldurinn slökktur á örfáum mínútum. Engan sakaði í atvikinu.

Nú er unnið að því að fjarlægja tækið, sem er mikið skemmt, af vettvangi.