Tíu fisktæknar útskrifuðust

Fisktækniskólinn Í Grindavík útskrifar á sínu fimmta starfsári.

Tíu nemendur útskrifuðust sem fisktæknar frá Fisktækniskóla Íslands en útskrift fór fram 22. maí sl. Fisktækniskóli Íslands býður upp á fjölbreytt nám í sjávarútvegi á framhaldsskólastigi.

Námið er hagnýtt tveggja ára nám sem byggt er upp þannig að önnur hver önn er í skóla og hin á vinnustað. Nemendur geta valið sér námsleiðir í sjómennsku, fiskvinnslu og fiskeldi. Verkefni og vinnustaðir eru valdir með hliðsjón af áhuga hvers og eins. Í fiskvinnslulínu læra nemendur um meðferð fisks, gæðakerfi, um vélar (t.d. Baader, Marel), tæki og búnað sem notaður er til að hámarka gæði og verðmæti fisks. Námið gefur möguleika á fjölbreyttum atvinnutækifærum í vaxandi sjávarútvegi. Í sjómennskulínu læra nemendur m.a. vélavörslu, aflameðferð, veiðitækni, sjóvinnu og rekstur. Námið er tilvalið fyrir þá sem stefna á strandveiði eða huga að öðrum störfum á sjó. Í fiskeldislínu sérhæfa nemendur sig til almennra starfa í fiskeldi eða búa sig undir frekara nám hérlendis eða við samstarfsskóla Fisktækniskólans m.a. í Noregi.

Þeir sem að útskrifuðust í þetta sinn voru: Elmar Þór Pétursson, Gylfi Sigurðsson, Ólafur Ólafsson, Birkir Mar Harðarson, Guðrún Sigríður Jónsdóttir, Íris Ebba Ajayi Óskarsdóttir, Þröstur Þór Sigurðsson, Victor Ingvi Jacobsen, Haraldur Örn Haraldsson og Anton Númi Magnússon.