Tilkynnið sprengjur tafarlaust í síma 112

Yfir 600 virkar sprengjur hafa fundist á svæðinu við Háabjalla á síðustu árum en svæðið var æfingasvæði Bandaríkjahers eftir síðari heimsstyrjöldina. Starfsmenn Landhelgisgæslunnar fara um svæðið árlega í leit að virkum sprengjum og talsmaður sprengjudeildarinnar sagði í samtali við Víkurfréttir í dag að merkingar vantaði á svæðinu, því það væri ljóst að þarna væri ennþá að finna fjölda virkra sprengja.

Fólk sem finnur óþekkta og/eða hættulega hluti skal gera eftirfarandi ráðstafanir:
a) Alls ekki hreyfa hlutinn.
b) Merkja staðinn þannig að auðvelt sé að finna hann aftur eftir leiðbeingum.
c) Tilkynna til lögreglu í síma 112 eða til Landhelgisgæslu í síma 545 2000.Sprengjuvörpusprengjur (mortar) eru í raun sprengjur með eigin drifhleðslu. Þegar þær falla niður í hlaupið springur hvellhetta í botninum sem kveikir í drifefninu sem er í kringum stélhlutan og sprengjan flýgur út úr hlaupinu. Kveikjurnar eru í nefi og svipaðrar gerðar og í fallbyssukúlum. Sömu varúðarráðstafanir gilda og fyrir fallbyssukúlur. Það verður ávallt að reikna með að kveikibúnaður sprengju sem hefur verið skotið, án þess að springa, sé læstur í virkri stöðu.

Myndin: Sprengjan sem fannst í gær var sprengd á svæðinu við Háabjalla í dag. Sprengingin var tilkomumikil og jafnframt ógnvekjandi, enda voru börn að leik með sprengjuna síðdegis á föstudag og höfðu meðal annars kastað henni nokkrum sinnum í jörðina. VF-mynd: Jóhannes Kr. Kristjánsson