Til hjálparstarfa í Pakistan yfir jólin

Nú í desember fer einn af þyrluflugmönnum Landhelgisgæslunnar, Þórarinn Ingi Ingason, til starfa fyrir Air Lift á hamfarasvæðunum í Pakistan en þar bíður hans það hlutverk að fljúga með vistir og nauðsynjar upp í þorpin í fjöllunum í kringum bæinn Abbottabad. Einnig að fljúga með slasað fólk á sjúkrahús úr fjallaþorpunum. Hann mun fljúga þyrlu af gerðinni Super Puma en Líf, stærri þyrla Landhelgisgæslunnar, er af þeirri gerð. Air Lift vinnur fyrir Alþjóða Rauða krossinn sem starfar í Pakistan en nú er einmitt mikið kapphlaup við tímann að koma fólki í öruggt skjól áður en veturinn skellur á af öllum sínum þunga.
Þórarinn Ingi fer utan 16. desember næstkomandi og kemur til baka 30. desember. Hann mun því eyða jólunum í Pakistan.