Tíð innbrot og þjófnaðir í Keflavík

Aðfararnótt fimmtudagsins var lögreglunni í Keflavík tilkynnt um innbrot í Kjötsel sem er í suðurenda Samkaups í Njarðvík. Brotin var hurð sem er á vesturhlið hússins og farið inn á skrifstofu þar sem brotin var upp skúffa og 15 til 20 þúsund krónum stolið.
Lögreglunni var tilkynnt í gærmorgun að unnin hefðu verið skemmdarverk á sameign í fjölbýlishúsi við Heiðarhvamm þar sem kveikt hafði verið í dyrasímum.

Fartölvu var stolið um hábjartan dag úr húsakynnum Fjölskyldu- og félagsmálaþjónustu Reykjanesbæjar en farið hafði verið inn um þakglugga og inn á skrifstofu þar sem fartölvunni var stolið. Talið er að atburðurinn hafi átt sér stað eftir klukkan 17:30 í fyrradag.

Drengur á fermingaraldri sást fara inn í bifreið við Faxabraut í Keflavík þar sem hann stal veski úr bifreiðinni, en lögreglunni var tilkynnt um atburðinn rétt eftir klukkan fjögur í gær.

Í gærkvöldi var lögreglunni tilkynnt um innbrot í hús við Heiðarból þar sem stolið hafði verið áfengi og bjór. Telur lögreglan að innbrotið hafi átt sér stað um miðjan dag í gær.