Þungt haldinn með kókaín innvortis

Hollenskt par var handtekið við hefðbundið tollaeftirlit við komuna til Íslands sl. föstudag með 1100 grömm af kókaíni. Karlmaðurinn sem er 27 ára var með um þriðjung efnisins innvortis og var hann var sendur á Heilbrigðisstofnun Suðurnesja þar sem losa átti efnið úr manninum.

Efnið gekk ekki greiðlega niður úr manninum og var óttast um líðan hans á sjúkrahúsinu í Keflavík og samkvæmt heimildum fréttastofu var sá möguleiki ræddur mjög alvarlega að skera manninn upp svo hægt væri að ná efnunum úr honum. Á Páskadag gengu þau niður úr honum en þau voru föst í meltingarvegi mannsins og í maga hans.

Stúlkan sem er 19 ára og er einnig frá Hollandi var sömuleiðis með kókaín falið innan klæða við komuna til landsins en hafði ekki innbyrt efni eins og fylgisveinn hennar.
Þau hafa verið úrskurðuð í gæsluvarðhald til 27. apríl og eiga líklega yfir höfði sér þungan dóm. Um 1100 grömm af kókaíni getur verið á götuverði á allt að 60 milljónir króna.

Rannsóknardeild Lögreglunnar á Suðurnesjum fer með rannsókn málsins.