Þrjú hjartatilfelli á þremur dögum

-“Mjög óvanalegt", segir Björn Ingi Knútsson, flugvallarstjóri

Þrjár breiðþotur, Boeing 747 hafa lent síðustu þrjá daga á Keflavíkurflugvelli með veika farþega sem hafa verið sendir á sjúkrahús hér á landi.Vél frá United Airlines lenti með veikan farþega sl. laugardag en hún var á leið frá Evrópu vestur um haf. Í gær lenti önnur vél frá sama félagi með svipað tilfelli þar sem farþegi var færður frá borði til aðhlynningar á sjúkrahúsi hér. Þriðja vélin lenti í dag, frá flugfélaginu AlItalia en hún var á leiðinni frá Milanó til til Boston í Bandaríkjunum.
“Þetta er mjög sjaldgæft en sýnir jafnframt hvað það er mikið atriði að vera með góðan flugvöll sem getur tekið við öllum flugvélum því í þessum tilvikum voru þetta allt breiðþotur", sagði Björn Ingi Knútsson, flugvallarstjóri.

Í öllum þessum tilvikum var um stutt stopp að ræða hjá flugvélunum. Einungis var sjúklingi hleypt frá borði og vélarnar héldu áfram sinni leið.