Þrír grunaðir um fíkniefnaakstur

Lögreglan á Suðurnesjum handtók í nótt þrjá ökumenn grunaða um akstur undir áhrifum fíkniefna. Þá voru tveir aðrir teknir vegna gruns um ölvunarakstur.

Skömmu eftir miðnættið var ökumaður stöðvaður á Reykjanesbraut  eftir að hafa mælst á 148 km hraða þar sem leyfilegur hámarkshraði er 90 km.  Samkvæmt sektarreikni Umferðarstofu þýðir það 130 þúsund króna sekt, eins mánaðar sviptingu ökuleyfis og þrjá refsipunkta í ökuferilskrá.