Þriggja bíla árekstur við Reykjanesbraut

Ökumenn þriggja bifreiða voru í fyrradag fluttir á Heilbrigðisstofnun Suðurnesja eftir að bifreiðirnar höfðu lent í árekstri á Arnarvöllum. Óhappið varð með þeim hætti að einn ökumannanna var í kyrrstæðri bifreið sinni að bíða eftir að komast út á Reykjanesbraut. Ökumaður annarrar bifreiðar beið þess sama fyrir aftan hann.

Þá bar að þriðju bifreiðina sem ekið var aftan á síðarnefndu bifreiðina sem við það skall aftan á þá fremstu. Allir ökumennirnir kenndu eymsla. Bifreiðirnar skemmdust allar og varð að fjarlægja eina þeirra með dráttarbifreið af vettvangi.

Fyrr í vikunni valt flutningabifreið á Sandgerðisvegi nærri gatnamótum Reykjanesbrautar. Hafði ökumaður hennar verið að vinna um nóttina og sofnaði undir stýri með framangreindum afleiðingum.