ÞORSKVEIÐIN AÐ GLÆÐAST!

Veiðin hjá netabátum er að glæðast. Menn voru ekkert kátir yfir veiðinni um síðustu helgi en binda miklar vonir við loðnugöngur og stórþorsk sem fylgir þeim. Þegar ljósmyndari VF var á kajanum í Sandgerði á sunnudaginn var verið að landa úr Svavari Steini GK. Þar á bæ verða menn að notast við gamla mátann við löndun þar sem kör komast ekki fyrir í lest bátsins. Hér er það Hilmar Hjálmarsson sem losar málið í kar á bryggjunni.