Þjónustusamningur milli Bókasafns Reykjanesbæjar og Keilis

Gerður hefur verið þjónustusamningur milli Bókasafns Reykjanesbæjar og  Keilis, miðstöðvar vísinda, fræða og atvinnulífs um aðgang nemenda að safnkosti og þjónustu Bókasafnsins.

Í samningnum er kveðið á um að nemendur Keilis fái frí lánþegaskírteini og aðgang að safnkosti bókasafnsins. Bókasafnið aðstoðar við innkaup, skráningu og frágang safnskosts Keilis og veitir nemendum upplýsingaþjónustu og aðstoð við heimildaleitir. Einnig er í boði safnkennsla í upplýsingalæsi og starfsmaður safnsins er á vakt í Keili á virkum dögum frá kl. 10-16 á kennslutíma.
Keilir sér um innkaup á sérhæfðum safnkosti og útvegar nemendum les- og vinnuaðstöðu með góðri þráðlausri nettenginu. Samningurinn gildi í eitt ár án uppsagnar.

Stefanía Gunnarsdóttir, bókasafns- og upplýsingafræðingur, hefur verið ráðin til að stýra þessu verkefni.

Myndin er tekin við undirritun samningsins í bókasafni Keilis. Það voru Steinunn Eva Björnsdóttir, kennsluráðgjafi Keilis, og Hulda Björk Þorkelsdóttir, forstöðumaður Bókasafns Reykjanesbæjar sem skrifuðu undir samninginn.