Þjóðarstúkan á leið í Garðinn?

Þetta varð mönnum á orði þegar vörubíll hlaðinn sætum úr stúkunni af Laugardalsvellinum hélt áleiðis út í Garð.

Þarna voru á ferðinni aðilar á vegum Víðis sem höfðu fest kaup á 300 sætum sem á að setja upp í stúku þeirra Víðismanna. Stúkan hefur reyndar verið við völlinn í Garðinum í um 20 ár, en hún mun nú fá nýtt og betra útlit.

Þess má geta að í ár á Knattspyrnufélagið 70 ára afmæli og eru kaupin á stúkusætunum liður í fegrun á svæðinu við völlinn, sem margir telja einn besta völl landsins.