Það myndi heyrast í einhverjum ef fiskimiðunum yrði lokað í einni svipan

„Það er erfitt að fylgjast með þróun atvinnumála á Suðurnesjum þessa dagana þar sem Keflavíkurflugvöllur er, beint eða óbeint, uppspretta 40% efnahagsumsvifa. Það myndi heyrast í einhverjum ef fiskimiðunum yrði lokað í einni svipan,“ segir Kjartan Már Kjartansson, bæjarstjóri í Reykjanesbæ í framhaldi af tilkynningu Isavia um uppsagnir 133 starfsmanna.

Langflestir starfsmanna sem nú voru að fá uppsögn eru búsettir á Suðurnesjum. Kjartan Már segir þetta mikil vonbrigði og áfall fyrir svæðið. Hann setur spurningamerki við þeirri ákvörðun að senda alla sem koma til landsins í sóttkví og hefði viljað sjá mildari aðgerðir af hálfu yfirvalda. Til skemmri tíma sé mikilvægt núna að styðja þá sem eru án atvinnu, m.a. með virkniúrræði.